入座後，店員話有好多飲品可以自己拎。 飲品包括檸檬茶、蘋果汁、提子汁、茶類、 汽水等等應有盡有。
放題紙有好多張，主要係日式及泰式食物:) 首先當然要叫下啲刺身嚟食下先
三文魚厚切夠肥美
北寄貝、馬刀貝及赤貝都新鮮爽口
八爪魚刺身超新鮮
甜蝦刺身夠甜，帶子唔算厚切但係都好新鮮鮮甜
日本角螺細細粒，爽口幾得意。泰式生蝦值得一讚係預先已經配有醬汁，辣辣地，充滿泰式風味
壽司方面又幾驚喜，整得幾靚幾精緻。叫左海膽花之戀、和牛卷、黑松露三文魚拖羅蓉卷、龍蝦沙律吞拿魚卷都唔錯
火炙三文魚腩壽司好味
手卷方面可以揀軟殼蟹手卷
軟殼蟹炸得香脆，仲配有蟹子及少量沙律醬，入面仲有生菜 ，完全感受到餐廳認真製作 紫菜仲要係脆嘅
另外當然要試下啲熟食，叫咗啲串燒嚟食，串燒嚟到擺盤非常靚
完全唔似普通放題咁，就咁呈上食物。 串燒熱辣辣，新鮮整起，食物有質素燒雞翼及羊架都高水準。 翠玉瓜、冬菇、甜薯、菠蘿等都燒得唔錯
炸物方面叫咗天婦羅蝦，都係新鮮整起，熱辣辣炸得好脆，好食
蒜蓉牛油雞翼諗住叫一隻試下，點知好香牛油味，整得真係好食呀
炸蠔炸得好金黃，配沙律醬好食，炸蝦餅就有點硬。花枝丸都唔錯，但食落似魚蛋
泰式料理方面叫咗炒通菜，真係同泰式鋪食嘅差唔多，認真唔錯
冬蔭公湯都ok， 有大蝦、蕃茄等配料。
串燒仲追加咗燒大蝦同鯖魚， 兩樣都燒得好香，蝦夠大隻，誠意十足
前菜仲叫咗八爪魚、中華沙律 及螺肉，都好食呀
海鮮方面仲有燒蠔及燒帶子，全部食材都新鮮整起，熱辣辣， 加埋面上的芝士及煙肉好夾。
熟食料理仲叫咗清酒煮蜆， 蜆夠多酒味唔算好濃，但係味道都唔錯。豆腐我覺得好好食 外面個皮脆脆哋，入面又夠滑
最後當然要食返啲甜品，心太軟細細粒，新鮮焗起，入面真係有流心，朱古力味香濃
另外仲有紅豆卷及紅豆福餅，兩個都好食，軟淋淋唔硬 ，餡料夠多
呢間放題落單快，員工見你寫好會自動收你嘅落單紙，非常有效率
而且見你食完會立即收碟，服務一流。 最難得係日本料理、刺身、泰式料理質素都好平均，唔錯
