華香雞 (已結業)

中午出去食飯見到呢間專食雞既”華香雞”，望完餐牌都覺得幾吸引於是就決定一試，用雞黎做招牌菜就當然一定要試雞，於是叫左個華香雞拼茶香雞，另外再叫左一個沙茶牛腩煲，兩個餐都揀跟例湯。見佢應該係主打健康，個例湯飲落都唔覺有落味精幾清甜。雙拼雞上菜一望都果然真健康，岩岩好都係雞胸位置，低脂之選! 幾欣賞佢薑蓉係自己打，唔會太重鹽，食落唔會過咸幾舒服。就咁睇表面2款雞顏色就好似切雞拼油雞咁，而事實上華香雞食落去味道都的確似係白切雞，無乜驚喜。反而茶香雞一入口好濃烈既煙燻茶香湧入鼻腔，就算雞既部份係比較鞋，但香味有補救到，如果下次再食一定會叫茶香雞就算。另外叫既沙茶牛腩煲一上菜滾住咁黎，沙茶味好香濃，個汁用黎送飯一流，牛筋煮得好淋好食，而牛腩就比較普通，可能唔夠肥所以比較有咬口，如果有淨牛筋叫就好。不過話晒呢間餐廳本身主打食雞，咁就對牛腩唔會太高要求。