地點：銅鑼灣時代廣場
菜式：新加坡菜
餐牌：茶餐15選一，有多款飯粉麵，多士小食都有，配冷熱飲品6選一，可以加錢升級餐飲。另外可以追加小食。另收加一。轉左餐牌。
33
19
仁當牛肉配雞油香飯 $82 另加一
仁當牛肉有七舊左右，質感都幾好，牛味唔錯。個汁味道濃厚，好惹味，辣辣地，面頭加上脆脆碎。伴有生菜絲同紅白蘿蔔絲酸菜解膩。雞油香飯一大碗，濕潤度剛好，味道唔錯，好香雞味。
無骨海南雞飯 $88 另加一
海南雞有脾有胸有翼，份量都唔少，雞皮滑而雞肉頗嫩，配上三色醬比你自己調味。伴有青瓜四舊解膩。雞油飯大大碗，仲有蟲草花蔥花清雞湯一碗，雞味好濃。
新加坡海鮮喇沙摻摻 $88 另加一
摻摻即係黃色粗麵加幼身粉絲，前者有咬口又滑溜而後者幼滑吸汁，加埋係好正嘅口感。個湯又香又滑，梛汁又夠，辣辣地好惹味。配料有兩隻連殼蝦，蝦頭有汁，肉質都算鮮，三隻連殼蜆好嫩口，兩粒魚蛋同半隻糖心蛋，四件豆卜，爽口芽菜，少少豆角，加上脆脆，口感味道豐富。
娘惹炸鮮奶 加$26 另加一
娘惹炸鮮奶一客四件，炸得外脆內滑，入面鮮奶甜度適中，而滑到好似漏出嚟，係一款超正甜品。
酸辣無骨鳳爪 加$38 另加一
酸辣無骨鳳爪一客8隻左右，好爽脆，伴有紅蘿蔔絲，洋蔥絲同芹菜絲加車厘茄，味道酸酸辣辣，好開胃。
香茅烤豬頸肉 加$38 另加一
越式烤豬頸肉一客6片，整得好爽脆唔覺太肥，食落皮脆肉嫩，墊有生菜絲，伴有酸紅白蘿蔔絲可解膩。另配惹味參峇醬。
呢度凍飲用既冰粒係長身，特別滑溜，連冰都好食過人。
菠蘿冰茶 跟餐
菠蘿冰茶好少見，茶味中帶適量菠蘿汁味，唔錯唔錯，下底仲有好多香甜菠蘿果肉，面頭加上一片薄荷葉。
1
馬來拉茶 跟餐
馬來拉茶好滑溜，叫左少甜，甜度都適中。茶同奶味道配得好，唔錯唔錯。
桔仔話梅水 跟餐
桔仔話梅水酸酸甜甜，下底好多咸桔皮，仲有一隻桔仔。
總括而言，茶餐份量似正餐，不過價錢平好多，仲包大大杯野飲，食物質素都好高。座位舒適，裝修勁靚。
