漁獲浜燒

營業中

休息中

今晚同朋友去咗銅鑼灣漁獲浜燒食晚飯，仲有我鍾意嘅龍蝦🦞二人套餐做緊特價。前菜蘿蔔牛舌，牛舌爽口，蘿蔔入味，食落去好似食緊牛肉咁。蟹籽蟹肉沙律🥗上層有好多蟹肉同蟹籽，配上新鮮嘅沙律菜蕃茄，清新好味。刺身三點可以+$98 升級袘羅、深海池魚、赤蝦，赤蝦夠大隻又鮮甜，袘羅池魚肥美。終於等到活龍蝦🦞浜燒，龍蝦非常新鮮，肉質彈牙，加上芝士一齊燒更加好味。活帆立貝浜燒都好大隻，可以配牛油或者清酒煮，今次揀咗清酒比較香，冇咁肥🤣另外以$88加配味噌蟹甲羅燒，蟹肉蟹膏配上梳打餅更帶出蟹膏嘅鮮味。紐西蘭牛柳，未食已經聞到香味，肉質非常嫩滑，配上燒香蒜片更加惹味。龍蝦頭味噌湯烏冬，食完龍蝦嘅肉，龍蝦頭就用嚟煲咗一個好鮮甜嘅龍蝦湯，配上彈牙嘅烏冬好滿足。