OPPA Coffee Bar Restaurant

營業中

休息中

聖誕連假前夕嚟韓國街搵食，佢餐廳門口貼滿餐牌同相，見到芝士影到超拉絲先比佢吸引左入去。下午三點幾時段一入去就有位，店比較細，枱同枱之間都唔係話太闊落，二人枱嘅話連擺袋嘅地方都無。其實餐廳食物種類都算多，但由於都下午茶時間，所以兩個人都係叫左兩樣嘢。-🍽芝士炸雞真係好邪惡好吸引，拉絲得好交關，芝士味濃郁，唔會話一陣就凍晒硬晒。同埋份量都好大，二至四人食都無問題。-🍽泡菜炒蝦就唔多推介，蝦大概得5,6隻，有好多紅蘿蔔絲同芽菜，泡菜都唔係話咁多，五花腩切得極薄仲要好難先搵到。但味道就頗濃，雖然唔太搵到泡菜但食落好重泡菜味，比泡菜凌駕晒所有食材嘅鮮味。整體而言，芝士類嘅食物質素都應該唔差，其他枱好多都會order，而且芝士全部都落得好重手。但各式食物既價錢相對黎講唔太值，成條街都有好多韓式鋪頭外賣主食小食，價錢只係佢嘅一半甚至係3分1。性價比略低，份量用料味道環境同服務都唔太比得上價錢。