新記冰室 (已結業)

依幾年有一股冰室熱潮，新記冰室都算係當中少有名氣嘅冰室，尤其出名芝士撈麵。今日經過見到新記冰室，一於就試下。而好耐冇食沙嗲牛嘅我叫左一個常餐b，濃沙嗲牛肉麵配火腿雙蛋多士，有d餓嘅我就加埋小食，兩隻芝士牛肉餃同忌廉蟹肉餅。飲品叫左杯奶茶紅豆冰。濃沙嗲牛肉麵的確係幾夠濃，牛肉份量正常，食落嫰滑仲帶少少筋位，沙嗲醬夠濃夠香，食落唔會太甜。麵底唔算淥到好諗，所以浸左一陣湯都仲有咬口。雙蛋火腿正常，叫左熟蛋煎得都唔錯，有少少脆邊唔會太老。多士新鮮焗起，牛油溶得都好均勻。小食方面，芝士牛肉餃皮唔粉，厚度適中，餡係牛肉包住左芝士，食落鹹甜鹹甜咁都幾夾，一啖一隻都得，不過就要小心熱啦！湯底都幾清，有d粟米粒，梛菜配料。忌廉蟹肉餅外脆內軟綿綿，幼滑忌廉充滿住成個蟹餅，都幾好食。奶茶紅豆冰大大杯，真材實料，食到大大粒紅豆同紅豆蓉，甜甜地，都幾好味~~