The Point Kitchen (奧海城二期) (已結業)

過年了要四圍辦年貨，辦年貨前梗係要食飽飽，今日來到奧海城「The Point」。龍蝦湯 : 上檯時已經聞到好香龍蝦味，入口濃濃龍蝦鮮甜味，相當足料。甘筍南瓜湯 : 入口好滑，南瓜味甜而不膩，湯入面嘅麵包粒吸收晒湯汁後好好味。香炸海鮮拼盤 : 海鮮有炸魷魚圈、蝦、白飯魚及軟殼蟹，賣相金黃，入口又香又脆，但依然保持鮮嫩，唔會炸得太乾，除左海鮮之外仲有薄薄嘅蓮藕片，沾埋蒜泥蛋黃醬食更加惹味。香蒜辣椒白酒炒大蜆 : 大蜆份量都幾多，入口鮮甜無沙，口感好飽滿，湯汁以車厘茄、大蒜、辣椒及白葡萄酒煮成，味道微辣，食完蜆後再用多士沾汁食，感覺好滿足。明太子軟殼蟹披薩 : 披薩有好多選擇，我地揀左呢款軟殼蟹披薩，除左面頭原隻軟殼蟹，配料仲有蝦及櫻花蝦，非常豐富，配上明太子醬及芝士，入口滿口海鮮味，披薩皮焗得好脆，食多幾塊都唔會覺得膩。呢度坐得非常舒適，環境寧靜，係度慢慢地嘆個午餐就最適合不過。