香港仔一品魚蛋王

營業中

休息中

落住雨，一出地鐵冇遠，見到呢間香港仔一品魚旦王，見甘就腳，而且牛味香濃，價格平民，就入去避雨加醫肚。話明魚旦王，邊少得叫碗魚旦麵試下，魚旦用鮮魚肉打成，魚味十足，而且彈牙，魚片頭炸到好香口，當然都好彈牙的，不愧係魚旦王。而且湯底鮮甜，聽聞魚肉做魚旦同魚片，魚皮就拎去炸，魚骨就淆湯，先至有甘正湯底。朋友點左牛腩魚麵，魚麵係其他麵鋪比較少見，形狀似烏冬，不過魚麵本身有魚味，而且比較軟身，適合小朋友同老人家食。岩就見隔離兩婆孫點左。至於牛腩，略嫌比較瘦，可能見我地女仔既關係，不過牛味十足，店員介紹因為全部牛腩，牛雜都係每日新鮮牛制造，務求令顧客每日可以食到新鮮而且價廉食物。而且全日有九款魚麵做特價，只賣33大元，仲包一杯野飲或者油菜，超值之選。朋友提議不如叫碟牛雜一齊食，即刻舉腳贊成，份量足夠四人食，而且有三塊牛膀，超多牛肚，牛肺同牛腸，點上自制辣椒醬同紅醋，一個字形容--正。如果下次再經過，可以試埋雲吞，都係即日新鮮包，已經急不及待。