餐廳播住廣東歌，裝修吹簡潔工業風，空間寬闊，越夜越多人。
招牌豬骨蜆湯：招牌湯底之一，先飲湯，然後再食火鍋。廚師每朝8點返黎預備，然後再熬制數小時，心機之作。湯味道清甜，濃味，豬骨同蜆味明顯，飲落唔會太膩，幾出息。
即炸魚皮及炸午餐肉：剛炸起，午餐肉角切，切得厚厚，充滿口感。炸魚皮大大塊，好脆口，無論就咁食或輕輕一浸湯底都好好食。
豪牛拼盤：有4款牛，頂層中間位順序數，牛小排、牛匙柄、牛頸脊同封門柳。牛切得厚薄適中，牛小排同牛頸脊油花豐富，口感嫩滑。牛匙柄脂肪較少，口感軟熟。封門柳比較瘦，牛味最濃，整體牛質素唔錯。
牛胸爽：稀少部位，牛前胸肋骨中間的筋膜軟骨部位，外觀白色。口感爽脆，有咬口，充滿骨膠原，淥8秒就食得。
五花趾：牛後腿大腿內側，兩小條牛腿肌腱，口感彈牙，幾咬口。
黑毛豬頸脊：脂肪分布均勻，口感爽脆彈牙，肉味濃。
白鱔片：切得薄身，容易掌握熟成時間。味道鮮美，新鮮，肉質紮實，帶有少少油脂香，入口唔腥。
花雕雞翼：腌得好入味，煮後仍有濃濃酒香。
牛心頂：牛心臟最頂位置，連接血脈同心臟嘅組織，每隻牛只有一條喉管，所以比較矜貴。口感都係爽脆同有咬口，味道淡，但吸汁力強，配呢個招牌湯底一齊食，正！
鮮蝦韭菜餃：皮薄餡料多，鮮蝦同韭菜味同樣均勻，脹卜卜，啖啖肉，幾好食。
牛丸及珍寶蟹柳：牛丸彈牙，珍寶蟹柳味道鮮甜，吸左火鍋湯底後就變得更加軟腍多汁，火鍋必選配料之一。
雜菜拼盤：唔好睇少呢個份量，成個碗裝滿晒。菜種類多，有油麥菜、生菜、娃娃菜、皇帝菜同白菜，款款爽甜新鮮。
烏冬：係日本烏冬，口感滑滑，掛汁。
飲品：咸檸七夠冰凍，解油膩。菊花蜜清甜，清熱氣。
