會所1號 博藝會

營業中

休息中

我屋企個公主(細妹)係個百彈齋主，喺食嘢方面更係食神上身，一係話材料唔新鮮，一係話食物味道麻麻，有時仲話菜式冇厘新意 OMG....知道ClubONE旗下酒樓會周不時更改點心同菜式，呢日就一家人(當然包括埋公主)去品嚐下啦~ 脆炸海鮮燒賣公主一見到，就好似選中駙馬爺咁，話一定要試下脆炸海鮮燒賣。 好彩，冇令公主失望，佢形容呢款點心食落去嘅感覺，極似婚宴上食到嘅炸蟹鉗，但宜家一碟只係30幾蚊，性價比極高 (得到公主讚賞 奴才好滾動)。蟲草花香撈螺肉好爽，又大碟，做前菜一流。蝦餃好好好大粒，蝦既爽口又彈牙，公主同我都覺得係必點。懷舊四寶扎扎得好穩陣實正，D料唔會咬一啖之後，就搖搖欲墜。 雖然呢個係好基本要求，但好多茶樓都做唔好。香滑奶皇包奶皇好流心，好香，可以一試，公主都話OK。 牛油馬拉糕好味，但我食唔出牛油味，但公主欣賞，話一睇樣就知道鬆軟，係好味馬拉糕條件。濃湯魚翅灌湯餃足料，魚翅又大又彈牙，但個皮麻麻地，有D厚。