聯發茶餐廳

營業中

休息中

其實我相信，呢間聯發茶餐廳都唔使點樣介紹，佢嘅炒蛋一早已經出晒名，九龍城名物頭十，一定有佢份。唔知點解呢排每一日都見到有人post，住得咁近九龍城就冇理由唔試吓，於是週末走去食個早餐，特別最想食嘅就係呢個漩渦蛋西炒飯。非常好彩，本來以為咁紅，一定要排隊，十二點入去，啱啱坐到最後一張枱，唔使等，好感恩。仲要食到佢限量出品嘅漩渦蛋西炒飯，同埋佢最經典嘅常餐。一定要叫嘅仲有常餐，奇怪佢嘅沙嗲牛肉麵又唔多沙爹牛肉關注組講，配合北海道出品嘅一丁，真係幾好，麵爽彈又掛沙嗲湯，牛肉唔算特別韌。佢嘅炒蛋同火腿絕對有華星同澳牛最好時間嘅水準，加多士嘅配搭，呢個應該係最好嘅常餐。漩渦蛋西炒飯，睇咗好多個post已經想食好耐，今日終於食到，炒得勁靚，打卡係二百分。入面嘅西炒飯勁多料，餐肉同腸仔仲多個飯，唯一係佢個炒飯比較濕，不過漩渦蛋喺上面，嗰個飯做唔到好乾身都十分正常。可惜西炒飯唔可以加錢有嘢飲，只係能夠常餐叫一杯奶茶，熱奶茶水準中等，如果個杯夠熱，應該會更好。以茶餐廳水準嚟講，夠快唔算貴，食物不錯，又坐得好，絕對值得一試。