火鍋煮場 (已結業)

上次嚟幫襯開咗個$100一百支啤酒嘅plan未用晒，梗係要趁未到期快啲再用啦，只可惜兩次夾埋都只係飲咗42支啤酒，仲有58支真係同志仍需努力。今晚主要飲西柚啤，因為上次飲過真係覺得好好飲。我仲聽到隔離枱話呢度抵過去酒吧添。除咗飲啤酒，我哋都食咗幾多野，首先打邊爐之前拉咗個刺身拼盤，入面有三文魚、筆記杯、帶子、八爪魚同埋墨魚，都幾新鮮。今晚嘅湯底就叫咗蕃茄蟹鍋，除咗有蕃茄同埋蟹之外仲有蝦、青口同埋顯，啲湯料分開上，隻蟹真係好新鮮，出嚟個湯都好鮮味。海鮮方面我哋仲叫咗鮑魚，一人一隻，脆口彈牙新鮮好好食。牛肉反而今晚淨係叫咗牛白肉冇叫安格斯或者牛頸脊，呢度嘅牛白肉切得好薄，真係桌一桌就食得，好爽好有牛味。記得上次食過佢嘅鵝腸好好食，係獅頭鵝嘅腸，因為鵝腸入面係黐住啲脂肪，有油當然特別香啦，尤其是鵝油。另外有叫咗新鮮雞子，佢嘅size比較細粒，味道都唔錯。今晚叫咗好多餃，有韭菜餃、魚皮餃同埋墨魚餃。我最鍾意食韭菜餃，因為韭菜好香。墨魚餃其實就有啲似台灣蛋餃嘅餃皮包住粒墨魚丸，魚皮餃都OK，其實三款搞嘅味道都幾好。最後仲叫咗竹笙、手打蝦丸同埋脆鯇片，樣樣都幾好食。