之前都唔知佢有呢啲offer，見到即刻心動，心動不如行動。
加上我以前食過佢嘅片皮鴨，印象唔錯（廢話，如果唔係點會喺中國開咗40間分店，仲以過江龍姿態殺入香港？）
時間管理
我哋book咗8點session，大約等咗5分鐘入場，20:05正式坐低。任食時間係90分鐘，埋單時間係21:17——大家可以do the maths。雖然差咗幾分鐘，但老實講，對我整體dining experience影響唔大，因為重點唔係時間，而係……
裝修
羲和雅苑香港店由曾登上美國《室內設計》封面嘅設計團隊操刀，中式典雅融合摩登風格，再加上維港美景，真係無得輸。但可惜，食物就……
食物逐樣講
前菜：三色皮蛋
清爽開胃，係成晚最穩陣嘅一味。
湯：黃扒魚肚
湯底還好，但魚肚未入味，口感偏硬，好似未夠時間煮。
放題
烤鴨：
第一輪：
仲老過我同朋友加埋嘅歲數，乾過我哋荷包，凍過我個心。
如果佢攞住呢盤嘢去北京話係代表北京烤鴨，我真係驚佢會俾人圍毆。
失禮人。
而且烤鴨個餅皮要三催四請先送上，本身已經夠凍，等埋就更凍更乾。
第二輪：
有改善，至少有溫度，但同我上次食嘅片皮鴨係兩回事。可能套餐同散叫真係有分別。
不過同平時比都係差d，不如烤鴨唔好做放題啦，直接每人一個portion ；起碼保持水準吖。
大閘蟹（母）：
佢真係可以註明只供母蟹，唔係唔得，但要講清楚。
蟹嘅size偏細，可能同季節有關（小貼士：秋初蟹細，秋尾蟹肥）。
第一輪唔夠熱，之後就好啲，起碼夠熱。
但到last order時，我哋想叫多幾隻蟹，就話最多3隻——呢啲限制真係要講清楚。
如果心痛啲蟹，就唔好做放題；直接俾每人一隻夠斤兩嘅蟹咪算囉。
做放題，就要預咗有啲客係真係會食得多嘅。
精品：鮑魚
夠淋夠入味，值得一讚。
時蔬：燕窩濃湯菜膽
無燴過，似係滾水煮熟再淋湯，味道真係無乜。你可以當係點菜膽落個濃湯度食。
主食：黃金蟹肉炒飯
呢個真係……見好多檯都食剩唔少。我覺得唔係大家有心無衣食，而係真心煮得唔掂。
醬鹹到好似UFO吸住啲飯，炒飯底又濕又黏，唔粒粒分明。
我哋試過空口食、撈醬食……都救唔到，投降。
甜品：
朋友要咗酸奶，話好健康；我要咗薑茶湯丸——全晚最好食係佢。
飲品：
有汽水、有花茶，唯獨無薑茶。
總結：食物方面：
最好食就係鮑魚、烤鴨個青瓜絲、湯丸。其他……唔講都罷。
如果做唔到，真心唔好做放題。
廚房跟唔上，樓面都跟唔上。
烤鴨餅皮要三催四請，食物跌 watt，完全唔係平時水平。
Last order叫多幾隻蟹都好似好為難——如果咁都頂唔順，真係唔適合做放題。
Service：人手不足
得一個年輕女侍應同一個男侍應苦苦支撐成個區域。
茶水唔熱要點蠟燭，換碟、上菜、收碟全部都係女侍應做，男侍應做輔助。
差唔多8至10檯客，兩個人做，睇得出係踢曬腳。
Dining Experience：麻麻哋
食物唔得，服務唔夠，90分鐘好似食快餐咁。
最緊要唔好阻人收工，樣樣嘢塞上嚟。
明白公司可能想吸引新客，但無論廚房定樓面，都指向一個結論：做唔到放題。
我係因為之前試過呢間餐廳，知道佢平時唔係咁嘅水平；但我朋友第一次嚟，三個字：永不回。
建議公司：
如果堅持做放題，建議自掏腰包請員工去成功嘅放題餐廳試試，睇吓而家嘅 standard 去到邊度，點樣可以更加改善。
結論:
明白公司搞放題係想吸引新客，呢個出發點無問題。
但吸引之餘，都要顧住質素，唔好因為一時衝動而做壞招牌。
我今次會的起心肝寫食評，唔係為咗鬧人，而係真心想幫大家 make the right decision。
我試過，唔代表你一定要試；但至少你可以有心理準備。
如果你真係好鍾意大閘蟹（母），go ahead。
但 if not，真係可以考慮散叫。
1
