王子廚房

營業中

休息中

今日喺屯門食晚餐，無意中喺置樂花園同埋龍城花園附近，發現到一間印度餐廳，餐廳入邊嘅侍應同埋主廚都係印度人，非常正宗。我哋三個人一坐低，夥計就送上麵包同埋餐湯，餐湯好香、好重胡椒味，味道好特別。主菜方面，我哋揀咗一份咖喱雞配印度薄餅，印度薄餅有兩種口味，芝士味同埋蒜蓉味，薄餅非常鬆化，又唔會太油膩，食到唔停得口。除此之外，仲有印度pizza，唔同頭先講嗰種薄餅，呢隻係有好多餡料嘅，Pizza底有少少似麵包，同香港Pizza Hut嘅Pizza差唔多質感，香脆鬆軟又好味。印度烤魚，熱辣辣連埋鐵板咁樣上枱，皮脆內軟，入面魚肉好香滑，仍然保留肉汁，非常鮮味。好特色、好少見，相信香港好少地方有得食。最後嚟一碟炒雜菜，有少少泰式風味，再加上少少黑胡椒，好惹味。整體食物質素非常高，價錢合理，而且味道好適合香港人嘅口味。