萬豐

營業中

休息中

呢條街食店臨立，大多都係親民貼地選擇，經過見到呢間食泰越菜。門口見到呢個二至三人套餐，原價七折，包冬蔭公/生菜包，小食，主菜及飲品，都係三百幾落得樓，就即管試下。食泰菜傳統湯品點少得海鮮冬蔭公，份量都唔少，每人都有兩碗。有青口，蝦，菇及泰式香料，如香茅及南薑等，酸辣度易令人接受，夠熱，蝦隻爽口，好快飲完一碗。小食拼盤有炸泰式魚餅，香茅雞翼，由於無香葉雞，轉咗炸蝦卷。全部入口都熱辣辣，雞翼外香內嫩，食一隻唔夠喉囉 (哈哈….)。條炸蝦卷香脆，點埋個泰式酸辣醬仲好味道。包2杯飲品，要咗泰式凍檸檬茶及桂花花蜜。凍飲夠大杯，而桂花花蜜又香又滋潤。仲有個蒜蓉魚露炒通菜，份量相對就普通咗D，炒得相當惹味。壓軸出場有馬拉盞炒飯配鷄肉串，仲有好耐都無食過嘅炸蝦片。將香口鷄肉伴以馬拉盞炒過嘅飯粒，一口食晒，惹味倍增。豬扒無貨，聽侍應講係用生果醃製，限量供應，賣晒就無。轉食牛丸湯檬，五大粒牛丸加檬粉，再倒金不煥芽菜落湯伴食。湯底清而甜，牛丸入口幾彈牙，食晒五大粒都幾飽。埋單都真係呢口價，相當抵食，目測二人枱多數都會叫呢個餐。