影片
更多
2017-02-18
536 瀏覽
同男朋友嚟荃灣拍拖，行到嚟呢頭，喺門口睇咗陣餐牌，見價錢喺呢頭都算平，咪行入去試下囉，行到入去個侍應竟然帶我哋去一張擺咗留枱牌嘅四人卡位，感覺怪怪的。是但啦，叫嘢食叫埋餐飲，我叫咗個嫩雞壽喜燒鍋跟烏冬唔跟餐飲，我男朋友就叫咗個定食跟汽水，個侍應仲好好咁提醒咗一句跟飲品就無餐湯。等食物嘅期間，個侍應拎完個爐過嚟就拎咗個碗仔過嚟俾我食鍋物用，望真啲個碗仔，係我哋平時屋企食飯嘅膠碗，乜⋯⋯我上咗朋友屋企食飯咩？之後個侍應又拎咗個餐湯過嚟，然後佢企喺度拎住個湯問我男朋友，「你係咪叫咗汽水嫁？」⋯⋯我男朋友無奈答返佢係，當時個場得幾枱客，絕對唔係忙，你仲要覆過單，都仲要問多次？ok，是但啦，起碼佢都肯再問先丫。之後食物嚟到，我男朋友食得快，三扒兩撥就食完佢個定食，仲好快咁飲埋佢罐汽水同一坐低俾你果杯水，之後佢問我杯水飲唔飲，因為個定食好多味精，但又搵唔到人加水。好啦，講返我個鍋，叫嫩雞鍋，你會聯想到啲雞係咩樣嘅？打邊爐啲滑雞柳？sorry，你真係諗多咗，我見到嘅雞，個樣比較似去骨烚熟嘅白切雞再連皮放返落個鍋度俾你。無錯，啲雞一上已經係全熟，再俾個熱嘅湯底你放喺個 Gas 爐上面再煲滾佢，所以我食
等食物嘅期間，個侍應拎完個爐過嚟就拎咗個碗仔過嚟俾我食鍋物用，望真啲個碗仔，係我哋平時屋企食飯嘅膠碗，乜⋯⋯我上咗朋友屋企食飯咩？之後個侍應又拎咗個餐湯過嚟，然後佢企喺度拎住個湯問我男朋友，「你係咪叫咗汽水嫁？」⋯⋯我男朋友無奈答返佢係，當時個場得幾枱客，絕對唔係忙，你仲要覆過單，都仲要問多次？ok，是但啦，起碼佢都肯再問先丫。
之後食物嚟到，我男朋友食得快，三扒兩撥就食完佢個定食，仲好快咁飲埋佢罐汽水同一坐低俾你果杯水，之後佢問我杯水飲唔飲，因為個定食好多味精，但又搵唔到人加水。
好啦，講返我個鍋，叫嫩雞鍋，你會聯想到啲雞係咩樣嘅？打邊爐啲滑雞柳？sorry，你真係諗多咗，我見到嘅雞，個樣比較似去骨烚熟嘅白切雞再連皮放返落個鍋度俾你。無錯，啲雞一上已經係全熟，再俾個熱嘅湯底你放喺個 Gas 爐上面再煲滾佢，所以我食成煲雞，每件雞都係已經老晒，無一件係嫩嘅。
咁到底個爐係有咩用呢？我望一望個鍋，雞以外嘅配料有唐生菜、黃芽白、大葱、冬菇、紅蘿蔔片同豆腐，菜係明顯無煮過嘅，咁要靠個爐煮熟好合理丫，但你點解要放埋啲熟嘅雞件落去呀？咁我應該趁個鍋一到個湯未滾啲菜未熟就夾起啲雞先，定要忍痛由得啲雞老都要等個鍋滾先撈起？望住個鍋，我望唔透，唯有將眼前放喺碟上面嘅烏冬倒埋落去慰解我呢一刻嘅心情。我拎起筷子，撥個烏冬落鍋，我 feel 到啲烏冬已經係熟嘅，因為係稔嘅，之後望一望隻碟係濕嘅，我更加肯定個烏冬係煮過。我倒完落去，同男朋友講原來個烏冬已經係熟嘅，佢即時喺個鍋度夾咗條出嚟試，佢都認同我嘅講法。咁俾個熟嘅烏冬又唔係罪嚟嘅，我最多咪當你想我快啲食完快啲走，但感覺好怪啫。。。
食日式鍋物，最正嘅莫過於個湯底夠濃，食材喺鍋入面慢慢煮，吸收湯嘅濃味。其實佢個湯底真係唔差，味道拍得住吉野家，為咗令啲菜同烏冬可以入味啲，我差不多要將個爐較到熄咁濟，啲湯先無咁滾，可以俾時間啲菜同烏冬入味。其實去到呢度，我同男朋友餐飯都入到最後大直路嫁喇，不過故事又未完嘅。
話說我哋坐低咗無耐，有兩位女士帶住三個小朋友入嚟，咁好正常就梗係放咗五杯水喺枱面啦，個侍應就企咗喺枱邊幫佢哋落緊柯打，其中一位女士，唔知因為咩原因，似乎唔係咁想食嘢，同另一位女士示意自己唔食喇，提議不如叫啲嘢食佢自己同啲小朋友 share 就ok，之後佢想拎起杯水飲，個侍應竟然唔俾佢飲果杯水，仲大大聲同個女士講「淨飲雙計」態度差都算，你交得租喺荃新天地租舖但你要慳一杯水？！之後成餐飯，我見住個女士真係一啖水都無飲，一啲嘢都無食，有一刻，我真係有衝動問個侍應拎多杯水請果位女士飲，我有幫襯，我杯水唔係淨飲喇呱！
可能有人問，當時無其他同事在場咩？有呀，不過無人走出嚟控制場面，更無人事後sa冧，起碼到我埋單走果陣都無。
味精重、鍋物 fail、餐具求其買、服務？我去澳牛無咁嬲，Sorry，無下次。
張貼
