大小姐冰室

放工約咗屋企人喺炮台山食晚飯，知道英皇道有間「大小姐冰室」，小菜非常出名，提議過去試下。餐廳嘅招牌好 Sharp 醒，純白門面、米白牆身，再配以一室簡潔明亮嘅裝潢，環境時尚有格調。餐牌分門別類，選項豐富。我哋點咗個精選二人餐 ($228)，套餐包自選菜式兩碟，另附送白飯、是日燉湯或例湯及熱飲兩杯。是日燉湯為蟲草花燉赤肉，燉湯真材實料，湯水清甜滋潤，蟲草花香味濃郁，飲得出冇落味精。跟住係是日海鮮，茄子盲曹 (+$10)，盲曹比想像中大條，先炸後炆，魚肉新鮮度足，食落非常嫩滑，配上軟腍入味嘅茄子，送飯一流！豉汁蒸白鱔 (+$30)  白鱔蒸得啱啱好，肉質肥美，食落爽脆彈牙，豉油同豆豉嘅份量亦拿捏得十分準繩，味道唔會過咸，墊底仲有滑嘟嘟豆腐，大人細路都啱食。跟餐飲品選了押上店名嘅大小姐紅豆奶茶 (+$9)，奶茶甜度剛好，紅豆粒份量足，夠腍夠綿密，順滑有茶香。另一杯熱柚子蜜味道亦唔錯，清香順喉。