Greyhound Café (新城市廣場) (已結業)

同朋友都好鍾意食泰國菜同埋西餐，於是今日就同朋友仔嚟咗呢一間專食泰式fusion菜食晚餐。雖然係平日，但係餐廳都已經坐左唔少客人，感覺都幾熱鬧。餐牌方面，食物款式都幾多，分別有泰式嘅食物，西式嘅食物，亦有fusion菜，望落豐富吸引餐具碗碟主要係以黑白色為主調，充滿簡約嘅風格我叫咗杯泰式凍咖啡，同我哋平時飲開嘅咖啡一啲都唔同，味道有少少似mocha，唔算好甜，幾有特色 小食方面我哋叫咗個冬陰公湯配意大利雲吞，冬陰公湯非常足料，裏面有大大隻大頭蝦，蝦肉新鮮彈牙，而個湯酸酸辣辣，味道濃郁，好開胃我哋仲叫咗個秘製辣肉醬手包粉卷，同我哋平時食嘅生菜包有少少相似，店員好熱心咁教我地先用粉卷包左啲秘製辣肉醬，之後外面再包多層生菜，再點醬汁，服務非常細心。辣肉醬味道濃郁，鹹鹹香香，點埋個醬，酸辣惹味主菜方面，我哋叫咗個脆炸豬手配糯米飯，豬手炸到外皮脆卜卜，肉質都幾腍，而且夠晒入味，幾出色，另外糯米飯口感煙韌，配豬手都幾夾。甜品方面，我哋叫咗個斑蘭千層糕蛋糕，賣相幾可愛，而且顏色鮮艷，斑蘭味道都幾出，而且千層蛋糕嘅口感煙韌，味道唔會太甜，食落都唔會好漏，為呢一餐畫上圓滿嘅句號。