嚐囍煲仔小菜

營業中

休息中

嚐囍煲仔小菜係米芝蓮2018榜上有名，梗係要去試一試啦。 我地好彩提早六點到左，如果唔係再過多陣，就已經大排長龍要等位嗱。嚐囍既食物好有香港地道風味，而且價錢亦都非常親民。我地叫左3碟小菜同兩個煲仔飯。小菜包括三色蛋芥蘭 (HKD 60)，枝竹牛腩煲 (HKD 75)和椒鹽9肚魚 (HKD 75)。至於煲仔飯就叫左白鱔滑雞飯 (HKD 78)同埋臘味排骨飯 (HKD 75)。芥蘭非常鮮甜，分量唔細，而且仲有好多皮蛋添。 個枝竹牛腩煲，未食已經聞到好香。牛腩一啲都唔韌，好稔。 枝竹又多，個煲真係抵食又好味。個椒鹽9肚魚，炸得好香口，唔會有油膩既感覺。賣相唔錯，有紅椒同蔥花做點綴。至於個煲仔飯，就用料十足，而且味道唔錯。 白鱔，滑雞同埋排骨都係啖啖肉。啲臘味味道唔錯，連帶啲飯都有埋臘味味。試完之後，終於知道點解嚐囍可以晉身入到米芝蓮。