Hungry Monkey (金朝陽中心二期 - Midtown) (已結業)

今日幫襯餐廳係登龍街地舖，門口已經見到啲霓虹光管感覺幾young，入去裏面播放著強勁嘅音樂，絕對適合年青人飲酒嘅地方。我就叫咗一杯日本流行嘅Highball-日本威士忌加梳打，朋友就叫咗一杯梅味Highball，入口冰涼，酒份量剛好。前菜叫咗一個梅水晶，係鯊魚軟骨，入口幾爽脆，個梅味非常濃郁，送酒一流。日本九州生蠔，生蠔飽滿，甜味重，入口爽脆。芥辣煮章魚， 芥辣味濃郁，都幾辛口，酸酸地辣辣地，章魚幾彈牙，呢個組合唔錯！清酒煮蜆，係你面前用個鐵板跟住用一個透明袋包住焗熟佢，蜆肉新鮮大大隻，最緊要高湯底加了少少紫菜，所以味道好突出又有鮮味，唔好嘥，一定要飲晒個湯！甲羅燒，賣相一流，有濃郁嘅蟹膏，加上蟹肉及三文魚子，仲有兩個蟹鉗，味道濃郁有鮮味，旁邊有啲清新的青瓜俾你一齊食，冇咁膩。明太子燒餅，師傅係你面前以鐵板形式煎熟，似日本嘅文字燒，面頭大量明太子醬，都算係重口味，你仲可以加埋啲紅姜絲紫菜調味。餐廳食物都幾好送酒，師傅係你面前煎熟食物，見到都吸引，有啲似輕鬆版的鐵板燒，氣氛唔錯！