BB雞蛋仔 (已結業)

雞蛋仔嚟到今時今日已經發展到五花八門，但無論當中加入有幾多變化，幾多gimmick都好，最重要都係睇返雞蛋仔本身，係唔係做到外脆內軟嘅質地，就算攤凍左，呢種質地係咪仍然能夠維持。好多時，原味嘅粉漿做出上面講嘅效果並唔難，但當加入其他味道，例如綠茶、奶茶、朱古力、紫薯等等呢啲不同嘅味道也好，色素也好，都會對原味粉漿嘅結構產生一定嘅影響。最初，見到香橙朱古力味，覺得好吸引，因為自己本身係好鍾意食香橙朱古力，同時見到佢牆上面貼有介紹，話香橙朱古力有好濃烈嘅香橙味同朱古力味，心裏面有份懷疑，但亦都想試一試。當將製成品攞到手，一望，覺得佢哋處理得好聰明！佢哋並唔係將可可粉直接溝落去原味粉漿，而製作出一份朱古力色嘅雞蛋仔，而只係直接將朱古力碎灑落粉漿，賣相會呈現出一啲斑紋，雖然唔係太清楚，亦唔覺得太靚，但起碼唔會影響原味粉漿出嚟嘅外脆內軟效果。佢哋嘅宣傳，強調唔會落精油，咁相信啲橙味都係來自香橙朱古力粒裏邊，至於報道形容話味道非常濃烈，我就有保留，覺得一般咁啦，都唔算差嘅！但外脆內軟就堅係肯定！最後一個測試，就係睇吓過咗一段時間，攤凍之後，情況會如何？ ... ... 結果，外皮都係變腍 ...