御泰坊-泰越菜 (已結業)

星期六接我男朋友放工，去左apm一邊行一邊睇下有咩食。竟然星期六唔係好多人，去d餐廳都唔使點等位，我見平時御泰坊都好多人等位，於是一於今次試下。我地一入去個侍應就俾左個好隱蔽既2人位我地坐，佢係一個角位咁既，真係岩岩好2個人同埋適合「情侶」用，所以我地第一次去而被安排到呢個位置都好開心。先叫冷盤，本來諗住食柚子沙律，但因為通常都係食呢一款，我地就叫左茄子帶子沙律。個menu寫住辣味指數2粒星，我地都冇咩所謂，於是試下。仲以為沙律係最先拎出黎俾我地食，但唔知係個侍應冇落單定係製作需時，我地等到所有熱盤都食左一半先至黎，而且d侍應個個都好似好新咁，同佢地講話個沙律未黎，叫佢地幫我跟跟，點知d侍應答左「好」完之後就走左去，又冇覆返我地，再等多一陣，個沙律終於出黎，我地都冇再追究落去，總之食完就算喇。我地睇少左個沙律，以為唔係好辣，點知第一口食隻帶子，超級辣，我地飲左一杯水都仲未沖淡到，如果鍾意食辣既應該會好d。講返之前既熱盤，我地叫左蝦餅、馬拉盞通菜同埋生牛肉湯河，2個人食差唔多喇。蝦餅好好味同好熱，跟埋d薯片，我平時會一口薯片一口蝦餅隔住黎食，感覺好似冇咁油膩。蝦餅都好爽口彈牙，值得推介。