Penna • Moon Garden

營業中

休息中

訂咗枱18:30嚟，我哋早到咗。當時餐廳只有一台客人。咁我哋坐低就嗌咗啲dinner sets再加其他食物。Starters都算快上左俾我哋，而個主菜就等左成個鐘都冇聲氣。咁我哋就問其中一個waiter，佢就好例牌咁話整緊。再過咗大約15分鐘，只見到其他遲嚟嘅客人嘅主菜都出埋、食埋，我哋張枱仲係乜都冇，係連隻碟都俾人收埋。我就用眼神一直追蹤嗰位話「整緊」嘅waiter，到底有冇幫我哋跟過。佢過咗一陣都同我哋講返追咗。然後我哋慢慢先聽到廚房話「開始」準備我哋嘅主菜。當時已經講緊等咗超過一個鐘。好啦，等到個主菜終於嚟到食埋。個甜品又係咁？！！唔知佢個Tiramisu係咪即叫即整咁威水，又係成半個鐘都冇聲氣，得隻吉碟喺張枱度。每樣嘢都要追一次，追兩次、三次先肯嚟。最後嬲到甜品都唔食就走咗。最終亦同經理表示不滿。之後佢一句抱歉都冇講過，只係機械式咁比個九折。要唔要嚟呢間餐廳就你哋自己諗。我就肯定唔會再嚟。