茜廊餐廳 (德福廣場1期)

營業中

休息中

第一次試呢間，因為朋友口中得知好麻麻所以一直無試，不過當日想試未食過嘅店舖，而且門口姐姐話是日係男人埋單有折，所以我同友人2人就入咗去了。友人叫咗唔知咩意粉餐，無興趣所以一啖都無食，包個餐湯同嘢飲。餐包值得一讚，半個芝麻包，切面搽咗香草牛油烘過下，周邊有少少脆，比起一啲淨起擺現成一點都唔後期加工嘅餐包好食，不過可以再烘脆啲硬身啲。紅湯一般，無咩特別。我叫咗個唔記得叫咩名嘅餐，有煎三文魚、豬扒同雞扒各一細塊，魚無魚味、豬扒無咩味「un un」地，雞扒無印象，墊底有一堆「林 bad bad」嘅蔬菜。個汁係南瓜蓉咁色，又係無咩味，唔多好食見小食平，三十幾蚊，所以叫咗兩個小食，焗什菌，黎到點知得一種菌（好似係罐頭菇），香草唔夠香同唔夠鹹。焗田螺，又係無咩味出面食肆通常偏鹹，佢反而全部嘢都好似無咩調味，淡而無味，食材又唔見靚。男士埋單有折，唔提侍應係咪有折，佢地唔會主動幫你打折，要你開口問：「唔係話男士埋單有折日咩？」至會幫你打折。無咩值得再去，我覺得大家樂大快活好食過佢。