必勝客

營業中

休息中

記得細路仔時喺大圍返學，中午會同啲同學仔去附近嘅必勝客買一件超級至尊加一客細忌廉雞湯做午餐，仲記得當時係賣緊$28一個套餐。到而家仲好記得入到去餐廳時嗰朕pizza嘅香味。時至今日，想食pizza真係隨時都可以食到。但係由於日本菜喺後期興起，自己都俾日本菜攻陷咗，以致有十幾年冇再去食Pizza Hut lu.呢晚為咗用咗啲U分，於是同家人相約嚟重溫童年回憶。但係可惜Pizza嘅味道同細個時相比已經相去甚遠，特別係芝士同茄膏嘅味道都唔夠濃，薄餅上面嘅配料好少，青椒同菠蘿只有兩三粒。唔同舊陣時係鋪到滿曬，啖啖肉。咁耐冇食，當然有些少失望啦。至於蒜蓉包，唔算十分香脆，麵包中間偏腍身，唔知係咪個別餐廳先係咁？但係蒜蓉味就好香，用800U分可以免費換到一客。其他焗飯焗長通粉都係用咗U分再加$10換，味道一般般，冇乜太大驚喜。