棽粵 (裝修中)

天氣開始轉涼，係時候食返啲滋補食品暖下身。古法羊腩煲鍋蓋打開香味四溢，羊腩喺香濃嘅醬汁之中炆到又鬆化又入味，羶味唔算太重，點埋腐乳醬就啱啱好，配菜仲有枝竹、馬蹄、冬筍等，食完之後會加熱剩餘嘅醬汁去煮生菜，平衡返油膩嘅感覺。太史菊花五蛇羹蛇肉、花膠、冬菇等各款材料切成幼絲融入湯中，口感滑溜中帶點爽脆，好滋補飲完即刻暖返晒。另有三碟調料分別有唔同嘅作用，薄脆可以增加口感、菊花花瓣可以清熱、檸檬葉絲可以癖腥，根據個人喜好加入適量令蛇羹更有層次。紅燒山瑞煲第一次食山瑞，香港唔多餐廳有得食，佢塊皮厚身而且充滿膠質，食落有黏黏的口感，肉質鮮嫩配上紅燒汁更加惹味。秋節生炒臘味糯米飯臘肉、臘腸、蝦米等份量豐富，令糯米飯食落特別甘香，糯米飯本身都炒得黏糯鬆軟粒粒分明。