私房御約

營業中

休息中

呢日同大帝車仔覆完診攰到冇朋友，叫老婆大人咪鬼煮飯出街食啦！揀咗去私房御約食蒸火鍋，貪佢近近哋吖嘛九龍站行落去好快到。揀咗龍躉海鮮餐都算多嘢食，而且仲有85折ok抵食啦。坐低就送嚟杭菊杞子桂圓茶，味道好香甜。前菜有醃青瓜，炸花生同海鮮大荳芽，係店家自己造架，味道都好正斗。侍應先下南瓜粟米鮮排骨粥料落鍋底，一陣吸晒啲海鮮精華嗰啖粥正爆。第一樣蒸嘅係花甲同海蝦，蒸幾分鐘就食得。花甲蒸到啱啱線鮮甜到痺，海蝦亦都好彈牙有鮮甜味。之後係蒸龍躉呢個正到不得了，魚香鮮香肉質嫩滑仲要巧彈牙，老婆大人讚不絕口。跟住侍應放咗幾條不知明物體入鍋，原來係帶子裙邊，先輕輕蒸熟比我哋食先之後才蒸大元貝，好細心呢！大元貝好厚肉咬落去口感一流，如果鮮味再強啲就一流。接力嘅係手打墨魚滑，鮮蝦滑同日本宮崎放養豬梅頭肉個名好勁咁喎！豬梅頭肉食落有彈性夠淋又夠滑，肉味香濃冇蘇味確係唔錯，而蝦滑都好彈牙呢。最後一蒸有紅棗蟲草花蒸雞香味好夠雞肉亦不鞋，再食埋清甜七色蔬菜蒸物便完了。到期待的南瓜粟米鮮排骨粥，都算夠綿身，香甜粟米南瓜溶入粥內味道香甜如果蒸多啲貝殼類應該仲鮮甜。最後仲有滋潤嘅桃膠雪耳木瓜糖水，爽爽的又唔太甜唔錯唔錯。