百芳池上便當 (大河道) (已搬遷) 新店位置

喺AEON血拼搶購零食雜糧之後，去咗佢地下百芳池上便當買lunch外賣。之前一直行過冇乜特別留意以為佢係做日本餐。 今次係第一次試睇清楚啲先知道原來佢係一間台灣嚟嘅餐廳，落單嘅時候好surprise佢幾位靚女員工都係講好流利嘅台語，所以未食之前已經感覺良好。佢個lunch menu有八種便當選擇，最後嗌咗個$59蚊台灣鹽酥雞便當。佢用個特別木製嘅圓盒裝飯做底之後上面鋪有粟米，菜脯，台式粉絲，西蘭花做伴菜之後中間再加啲芫茜喺底, 鹽酥雞喺面再加半隻鹵蛋。佢成個lunch好健康，係一個營養餐加炸得香脆滋味台式鹽酥雞。冇諗過個便當lunch可以咁balance.飲品我就加咗杯特飲桂花烏龍茶，好清新有茶味。我好奇心想試多啲所以再加咗一份台灣小食炸花枝丸，炸得香脆最重要冇雪藏味食落新鮮。下次可以返嚟試佢個炸雞髀花都好吸引，欣賞佢所有嘅炸物都炸得乾身唔油膩同埋個味醃得好。