炑八韓烤 (偉華中心) (已結業)

突然間心癮起想食石頭鍋飯，所以近近地去咗炑八。佢嘅午餐石鍋牛肉飯只係＄68都幾抵食。石鍋上台熱辣辣，配料都好多。有牛肉、紫菜、大豆芽、節瓜、菠菜、紅蘿蔔、洋蔥等， 中間仲有一隻蛋。將所有材料撈埋一齊食，再加埋辣醬調味， 大滿足，全鍋清曬！跟餐仲有韓式例湯同泡菜， 好一般吓。餐飲叫咗士多啤梨特飲，裏面有士多啤梨、藍苺同埋一片薄荷葉。佢應該冇乜加糖調味，同埋可能啲生果浸耐左，所以感覺到有一陣爛生果嘅味道。飲咗幾啖就放棄了， 飲水好過。見口乾乾，所以叫咗柚子水信玄餅。其實佢應該係日式嘅甜品，但就係韓國餐廳出現， 日韓日韓差唔多啦。水信玄餅其實係一個無味既啫喱，正宗應該係用寒天粉做嘅，細心感受下其實有少少苦澀味。佢係靠旁邊嘅柚子蜜令佢有D甜味，買相都幾靚。同埋佢酸酸甜甜凍冰冰，啱啱好清下個石頭飯既熱氣。呢個配搭都唔錯，下次可以再 encore。