陶源酒家 (已結業)

已經有一段時候無到ISquare高樓餐廳食飯，今次同朋友食飯，選擇左呢間質素相當高嘅中餐，仲有璀璨夜景相伴添~~先黎幾碟小食開開胃，素鵝炸得外層金黃酥脆，但一啲油膩嘅感覺都無，而內裏餡料豐富，菇粒有咬口，誠意度十足。而冰燒三層肉賣相精緻，味道亦甚具層次，燒肉皮香脆，而肉質細嫩軟滑; 而冷盤沙薑凍豬手，沙薑味道適中，豬手肉質晶瑩，口感彈牙，亦係一道具質素嘅前菜小食。吉品佛跳牆係今晚嘅主角，完盅燉好上枱，必然是熱辣辣，先品嚐一啖熱湯，味道濃郁而夠清，感覺已經滿足。再睇睇盅中嘅真材實料，遼參、花膠、吉品鮑、魚翅通通有齊，簡直就係矜貴豐富而名貴，難怪呢個佛跳牆係咁出名。佛跳牆之後叫左兩道小菜試試廚師嘅手勢，翡翠炒鮮鮑片炒得甚具穫氣，樣樣食材炒得爽口，亦食得到鮑片彈牙嘅口感同應有嘅鮮味，確實不錯;而黃金蟹肉煎釀帶子，帶子先經過走油香煎，然後再加上蟹肉一齊炒，完美呈現海鮮應有嘅鮮味。