珍姐海鮮火鍋飯店

營業中

休息中

其實呢間餐廳午市時段就做客飯，夜晚就打邊爐咁我一支公就梗係午市時段食飯啦，餐牌上有好多選擇，今次我就叫咗個咖喱羊架飯，嚟緊我都會試晒唔同款式嘅午市客飯，敬請期待我嘅食評。個飯一上到嚟，已經聞到好大浸咖喱味，第一啖食咗佢個咖喱先，椰香味好重，味道比較溫柔，唔食辣嘅朋友都接受到！我第一次用「滑」呢個字形容咖喱，口感幾好，非常順滑。重點係，廚師為咗辟走啲羊騷味，應該加咗啲檸檬葉/香草，令到成個咖喱飯畫龍點睛。到個主角，羊架，首先佢係上咗粉，炸咗少少嘅，所以佢嘅外皮呈現金黃色，而且非常鬆脆。而內裏羊肉十分之淋，唔會話咬唔開，做到外脆內軟嘅效果。至於味道方面，啱啱講咗用咗檸檬葉/香草去辟騷味，如果擔心有太多羊騷味嘅朋友可以放心去食，無騷味但同時亦保留羊肉嘅味道，處理得非常之好。