寶哥火鍋味館 (已結業)

年尾流流，天寒地凍，又係打邊爐嘅好時候，今晚揀嘅係油蔴地長樂街嘅《寶哥火鍋》。$268三個小時火鍋任食放題，咁就梗係要去試吓喇!先嚟係隨套餐奉送嘅和牛拼五款刺身拼盤，有北寄貝、八爪魚、希靈魚、魷魚、生和牛。跟住就有呢五款特選海鮮，其他食材就由你任點任叫。呢度嘅湯底都有好多唔同嘅選擇，我哋今晚揀咗個清清哋嘅人參醉鷄窩。任食放題，梗係乜都叫啲試吓，咁唔覺唔覺就叫咗一大堆食物。打邊爐又點可以冇牛肉 ，今晚我哋去盡啲，一次過試曬本地牛坑腩、特級美國肥牛肉、五香鮮牛肉，各有特色，各有滋味，高下難分。平時打邊爐，啲丸就唔係我杯茶，不過呢度啲丸的確幾出色，蝦丸、鲮魚肉丸同墨魚丸。尤其係蝦丸，爽口彈牙之餘，食到粒粒鮮蝦肉，完勝街外一般貨色。喺飲品方面，除咗啤酒汽水任飲之外，仲有竹蔗茅根精同酸梅湯畀你選擇。打邊爐最重要係食材新鮮，呢度絕無將貨就價，食材夠鮮，款式亦多。如果戰鬥力夠强嘅話，畀200幾蚊，三小時不停飲不停食，認真超值。