am.pm (譽發廣場)

營業中

休息中

之前經開油麻地旺角，每次都想去Am.pm試下甜品，因為聽聞佢哋嘅甜品款式又多又特別而且又好味，但每次去都超多人圍住，今次終於的起心肝點都要去試下。叫咗金燒奶黃布丁多配日本3.6牛乳雪糕，特濃朱古力香蕉梳乎厘，同埋一杯百年之蜜蘋果飲。布丁多士兩面都煎得好香脆，外脆內軟，出面亦都有層焦糖喺面，入面就軟綿綿，而且點埋奶黃醬同埋cream食簡直係一流。而另外日本3.6北海道牛乳雪糕係天藍色，成個甜品除咗好味之外 個賣相亦非常靚，絕對係打卡之選。梳乎厘亦都熱辣辣好好味，特濃朱古力醬同埋朱古力碎片喺面再襯埋焦糖香蕉一齊食，個口感絕對一流。我自己幾like, 唔係個d梳乎厘咁好似食空氣，而係有d質感又軟綿綿會令人食到停唔到口。百年之蜜蘋果飲又係整得好靚，面頭係棉花糖同埋爆炸糖，跟住係一層奶蓋，底部就係好香甜嘅蘋果汁加埋百年之蜜，所有嘢加埋好正，絕對係夏天解暑之選。