一樂小鍋 (已結業)

一向好鐘意食車仔麵嘅我，嚟到今日石門食肆多過大圍咁滯，真係花多眼亂，於是就揀左一樂小鍋食，首先我今日係午市時侯來就主要係車仔麵，聽聞佢晚市仲有火鍋食，下次有機會再嚟試試。講返選項，個人覺得特別之處係麵條選擇多 ，有波菜麵，准山麵，紅菜頭麵及泉水烏冬等等。紅菜頭麵真係第一次食，感覺健康無咁油膩，結果係好清新，加上湯底無味精，好好味令你會想飲哂成碗湯嘅衝動。餸方面我揀左金錢肚，豬頸肉同秘製札肉卷，份量大加上好稔，又入味。另一碗係泉水烏冬餸揀左牛筋，豬大腸同雞翼。烏冬食得出係真正日本烏冬，比較扁身及透明，其他餸都係好夠份量同夠稔，收貨之餘仲感受到小店誠意製作一碗用心嘅車仔麵。