囍八方餃子麵館 (已結業)

同事推介呢間囍八方嘅餃子，佢話試過買生餃子返屋企打邊爐個個都話正，所以今日就嚟試吓佢啲餃子。舖位唔算當眼，前面有一啲排檔擋住，所以要知窿路先識得來。食物選擇都幾多元化，除咗餃子之外，仲有牛腩豬軟骨之類，亦都有飯餐比食客選擇。我就叫咗個常餐米線。套餐就有麻辣雲耳青瓜同埋滷水蛋做小食。麻辣味都幾嗆，對我嚟講有啲辣，滷水蛋係一整隻上菜，都滷得幾好味。米線嘅湯底係魚湯底，因為我叫牛腩，所以溝咗啲腩汁入去，我就覺得蓋過咗魚湯本身嘅鮮味喇。鮮蝦菠菜餃果然值得推介，首先係佢嘅皮好薄，薄到半透明嘅狀態，食到有原隻蝦喺入面，同埋佢應該係加咗啲馬蹄粒，所以食落帶點甜同埋爽口，令到口感相當之豐富。成個套餐$49 ，價錢都算合理，如果我下次再嚟，我會專心試埋其他餃子款。