麪譜車仔麵 (已結業)

好凍！一凍除咗澱粉質，更抗拒唔到熱湯嘅呼喚！自問唔鍾意食粉麵，不過呢間近近哋嘅車仔麵成功吸引我注意。Lunchtime見好多學生喺門外排隊等食，望望餐牌價錢經濟得嚟又幾有態度咁，壯陽番茄濃湯、hea底牛腩汁、是但麻辣汁、求其辣汁......啲名玩創意都值得拜會一下碗麵嘅真身先知龍與鳳！車仔麵識食係食油麵，或者呃.....粗麵啦！壯陽番茄濃湯係濃到可以掛湯，雖然明顯有加茄膏提味，不過都食得出有堅係鮮滾嘅粒粒蕃茄肉，所以都算pass啦！另外朋友嘅是但麻辣汁偏咸，係重口味人士之選。餸方面瑞士留學雞翼、清純蘿蔔妹、藤椒煲老藕嗲同秘「魯」腩仔肉都唔錯。小食花膠教煮同麪譜口水雞都推介，好食又抵食！