冒喜 (蕪湖街)

營業中

休息中

喺蕪湖街一落巴士，就俾間店面裝修充滿中國特色嘅四川冒菜吸引，好奇心驅使就入去試吓。餐牌有三款套餐，形式有啲似車仔麵咁。最吸引，當然係有好多款特色辣湯底，好似貴州臭豆豉湯底就唔係隨處可見。因為怕辣，所以就同朋友揀咗養生白胡椒湯底。我哋試咗好多款餸，包括：潮汕手搥牛肉丸、墨魚丸、午餐肉、魚腐、萵筍、鴨血、海帶結。甚有打邊爐嘅感覺。手搥牛肉丸同一般牛丸真係好唔同，特別彈牙而且牛肉味好濃又多汁！今次最特別係食咗叫貴州丁家脆哨。佢係類近豬油渣嘅小吃，但就由切成丁的豬肉經過醬油，鹽，醋和甜酒醃製後熬炸而成。入口脆卜卜好香口，加埋麵一齊食可謂絕配！兩款小食：紅油涼拌豬肚同秘製藤椒魚皮都係辣辣小食。個人特別喜歡個魚皮，非常爽脆惹味，很好咬口份量又大，好抵食！怕辣推介，洛神花山楂蘋果茶同酸梅青檸烏龍茶，兩款自家製飲品剛剛好可以解辣，又唔會太甜。食到好飽都係二百幾蚊，真係好值得去試吓。