牛大人台灣火鍋吃到飽 (瓊華中心) (已搬遷) 新店位置

自從牛大人中午冇咗香芋雪糕之後，我都有一排冇去食！不過都真係幾掛住佢啲味道，今晚去咗食晚餐。原來牛大人而家做緊夢王祭，如果叫極上和牛套餐，每人送醬油夢王蛋或者夢王生雞蛋👍 夢王蛋個蛋黃好紅，蛋味好香濃，生雞蛋用嚟點牛肉食好正，令到口感牛肉更香滑，味道更加好！我哋今晚揀咗兩個最夾嘅湯底：地方紅燒牛骨湯同埋麻辣湯，兩個湯底都好濃味，配風琴豆腐同埋蜂巢豆腐一流！牛肉方面，必點嘅包括美國SRF黑牛、澳洲和牛M5牛肩卷同埋封門柳。前兩者肉質幼滑、脂肪比較多；封門柳冇乜脂肪，肉味比較重，千祈唔好淥得太耐，會好硬！平時好少食海鮮，今晚點咗沙白，點知就停唔到口！沙白大大隻又鮮味，可以任食真係好正😋今晚我哋不停追加任食嘅小食：三色鮮蔬夢王脆蛋，好似食緊天婦羅蔬菜咁樣幾好味。另外仲有勁多配料，任君選擇。飲品方面，除咗一向有嘅樽裝茶同罐裝飲品，依家仲有鴨屎香檸檬茶，呢個都係必飲推介，檸檬同青檸嘅香味突出，唔會好甜。最後甜品可以揀仙草或者雪糕或者夢王蛋布甸，真係食到好飽好滿足呀！