得一個人都想食燒肉？
放工一個人都想食得好少少？
呢間燒肉一番好適合燒肉控嘅你。
入面環境好寬敞、乾淨及舒適，除了可以一大班朋友坐埋一齊燒肉之外，佢哋嘅價錢不用$100就有一個套餐，有燒肉，有飯，有前菜，有湯，滿足脾胃之餘又經濟實惠，亦好適合遲左收工自己一個人食飯嘅打工仔，好似我就應該會經常捧場啦 ! 約埋三五知己，叫多幾味亦都好化算， 叫多幾碟都唔會太大負擔。
同朋友2 人分別點了一個套餐及以優惠價追加燒肉，選擇真係好多，而且好抵食!
安格斯肉眼套餐$168
包含前菜,麵豉湯及白飯，但想食得再滋味啲，可加 $8轉紫菜飯，超多紫菜及芝麻，勁香。而且好細心，還附上一把大剪刀，用來剪開成塊面咁大嘅安格斯肉眼。
一路燒一路見到啲肉汁標哂出嚟， 香噴噴
個爐都夠火，好快就燒熟，味道真係濃郁可口，而且無需要好費勁去咀嚼，安格斯牛肉味齒甲留香。食落真係同其他燒肉與眾不同，味道非常突出。
另外套餐可以優惠價追加一份燒肉, 要咗一份豚五花50g-$38， 份量唔會太多啱啱好 ，五花腩片肥瘦比例均勻，燒完之後油脂滴晒出來。
牛肉三食套餐(可5選3)$168
加了$15轉一番玉子飯, 除了有紫菜及芝麻，亦有大量木魚及温泉流心蛋，筷子夾一下，蛋王汁流曬出嚟，撈飯或拌燒肉食真係一流。
牛肉三食中點左牛五花、牛板健、牛小排。
牛小排比較有厚度，雖然無安格斯牛咁濃郁及多油脂，但都有少少鲜甜，燒到肉邊脆脆更加香口好食。
跟套餐用優惠價加了一份雞腿肉， 超級多汁嫰滑。
其實，餐廳仲有其他小食，海鮮等俾你選擇，另外點了2隻扇貝$68 及忌廉蟹肉薯餅
特別喜愛蟹肉薯餅，裡面超多忌廉，十分綿滑，而且 隱約食到一絲絲蟹肉， 味道不錯!
本身每張枱都提供左好多調味料俾你燒肉二，例如有蒜蓉、燒肉汁，酸汁，胡麻醬及海鹽，但自己覺得無需任何調味料，原汁原味都已經好好食。
