安平燒肉

營業中

休息中

燒肉放題中，安平從來都係我既首選，朋友想食好耐，但夜晚比較多人，我就同佢早啲黎食晏晝，好彩一開門就黎，遲少少坐滿晒！呢度地方好大，坐位相當闊落，坐得舒服。我地叫左澳洲M5 和牛吃到飽，咩牛都叫得，食足兩個鐘。M5和牛同牛小排係必食，油脂分布均勻，極黑牛就瘦少少，但肉味濃，另外仲有牛舌。牛舌芯係送既，呢個超好食，爽口彈呀！建議每樣點少少，鍾意食邊款就再encore，豬肉方面我地點左豬頸肉，燒到面脆入面爽口都好好食。海鮮我就推介扇貝。呢度啲熟食同樣出色，超級推介櫻花蝦乾拌手工麵同金沙翠玉苦瓜，另外仲點左梅山酥炸薯，安平炸蚵卷同鴨舌，同係正既！自助區有飲品，蔬菜，滷肉飯同湯，個蕃茄洋蔥牛肉湯我另外再左啲紫菜同櫻花蝦，好好飲。蔬菜類我推介秋葵，脆肉瓜，杏鮑菇同南瓜，可以夾埋肉食冇咁油膩，菠蘿燒到面蕉，又香又甜！生菜就可以包肉食。天氣咁熱最梗要係杯凍飲，呢度啲野飲夠晒凍，當然唔少得佢哋自家製冷泡茶。調味料方面有五款俾你選擇，我鍾意落少少檸檬汁，冇咁油膩得黎又提鮮，呢度啲肉靚，食原味道已經好好味。芋圓仙草凍同Häagen-Dazs朱古力雪糕畫上完美句號。