一杯屋

營業中

休息中

難得要返Office，放工就同同事小酌一杯，我地去左位於銅鑼灣嘅一杯屋居酒屋。餐廳格局都唔錯，幾有日系風格，而且間隔上似劃咗包廂，私隱度高，特別係呢個時勢同人隔開啲都好。雖則兩條佬嚟食，但都唔係食咗好多，反而係食串燒同一品料理為主，選擇多，上菜亦快。首先要左一份美國牛小排，睇賣相就已經覺得好靚，燒至大約五成熟，咬落好Juicy。可能因為燒香左，就唔覺啲脂肪位好肥膩。女友唔喺度就叫條魚食下，因為唔使揀骨比佢。呢條鹽燒喜之次Ok喎，一放低已經有燒即香氣，二來肉質細嫩，配上酸汁食更能突顯鮮味。之後就食咗一連串嘅雞串燒，估唔到雞嘅種類都咁多啊！當中包括簡單用上七味粉調味已經好食嘅雞心、雞小肉同雞腎；比一般雞軟骨爽口彈牙嘅雞胸軟骨；以及比較少見雞橫隔膜肉，上面加咗山葵麵豉醬，店員話呢個醬能將最原始味道呈現。佢其實係內臟，但冇腥味，幾有咬口。最後係燒大黑菇，切片上食得方便，隻菇無燒到乾，食落依然多汁。