熊小館

每次嚟到九龍灣「熊小館」親子餐廳，感覺好似都重拾回咗一顆童真的心，餐廳環境裝潢、裝飾、擺設、食物、飲品都融入了小熊嘅元素，不過最值得欣賞嘅係兩位男Staff親切有禮、熱情嘅態度，彷彿尚未被世界折磨得遍體鱗傷，面對住我依啲大朋友嚟食成年人版兒童樂園餐，依然提供滿滿的情緒價值。

*此餐廳收取全單10%服務費。

黑松露牛柳套餐（單點$168），大草原牛柳扒肉質七成熟，口感軟腍，外層煎得帶點焦香味道，配以黑松露牛油熊仔、自家汁食用，食落牛味更加突出；薯菜包括有西蘭花、車厘茄、粟米、粗切薯條。

小熊堡套餐（單點$128），表面鋪有白芝士片、朱古力豆，白芝麻漢堡包底、面兩層內裏都搽滿牛油，食落非常香口，安格斯漢堡扒食落牛味濃厚，內有番茄、生菜、特製蛋黃醬，粗切薯條即叫即炸。

唐揚脆脆雞翼（單點$48），雞翼口感外酥脆內嫩滑，略嫌炸得稍為乾身，配以沙律醬、番茄醬食用，味道更佳。

橙汁熊熊（跟餐$18），鮮橙汁味道酸甜，冰熊採用西柚汁製作。

熱奶茶（跟餐$0），口感幼滑，茶味濃香。