甘味讚岐手打烏冬 (已結業)

星期六銅鑼灣下晝睇完醫生，對我呢個九龍人嚟講難得過到海冇理由咁快走嘅，死都行夠同食埋晚飯先走啦！同朋友食飽咗下午茶，到差唔多九點冇理由唔食晚飯嘅，行到皇室堡，間間食肆都要等位，上到樓，呢度同隔離兩三間冇人排，就揀咗呢間。橫掂九龍區食過都唔錯又耐冇食同朋友真係唔多餓，於是叫咗一碗烏冬，一個小食，同一碟壽司就算 (加$15有杯嘢飲㗎！不過只限叫一次)首先杯飲品到，我朋友飲嘅，巨峰提子梳打，我本身對對隻提子冇好感，不過都啜咗啖，好香提子味，唔假，梳打都好夠氣。我朋友讚嘅！再嚟小食，係雞軟骨，好熱，炸得剛剛好，因為佢話係黑椒嘅，所以好香，但唔辣！好味。跟住係個烏冬，蕃茄湯底吉列豬扒烏冬，個湯底超濃，我覺得好飲過尖沙咀某餐室嗰個，酸酸地，勁開胃。塊豬扒炸到好熱，好脆口，好正。加埋個烏冬唔冧，真係好得！最後嚟就係碟壽司，雜錦壽司，有兩隻我同個朋友都唔知係咩嚟，請原諒我哋孤陋寡聞，不過食落幾好味，件件都細細舊，一啖放哂落口，醋味剛剛好，魚都算新鮮，OK啦！我哋想再叫甜品，一嚟個胃冇位裝，二嚟人哋收十點冇時間，只好下次再食啦！