華嫂冰室 (已搬遷) 新店位置

係屯門讀書，去華嫂都唔算遠，但其實家住港島東，畢左業後應該唔會咁誠心入黎朗屏食，所以決定係畢業前食一次！華嫂1-2pm會休息，所以12點前去就食到1pm前，如果要食2點後就1點半去排定隊。我地1:20pm左右去到排第一個。點左蕃茄雞翼豬扒通，咸牛肉旦治招牌菠蘿包。2個人share好飽，一個人應該食唔哂一個麵加個包。個通粉我覺得湯底有d太酸，但雞翼豬扒都煎得幾好！下次黎會試下其他。同行既男仔話咸牛肉旦治好正，正過招牌菠蘿包，但我食過舊時銅記禮敦麵包店既蛋牛治，依然覺得係最好食。不過華嫂用熱狗包，我覺得正過一般用方包，但整體都係普通水平。我本身好鍾意食夠熱夠脆既菠蘿包，所以呢個招牌菠蘿包係我最愛。本來未黎之前，我覺得招牌菠蘿包只係一個加左茄蛋既菠蘿包，味道應該可以預計到，但估唔到食落層次好豐富，個菠蘿油同蕃茄煎旦又離奇地夾！希望係畢業前可以黎多次，係港島應該無咩機會食到，早起身都抵既！