Aussie Grill by Outback (已結業)

最近見薯片關注組過呢度手工薯片好正，即刻黎食啦，賣相唔錯，幾吸引。而且見有下午茶，直接黎食手工薯片都得。先下單付款，取震震機放枱面指定位置，店員會送上食物，任飲汽水就自助添加。脆蝦牛肉芝士漢堡配手工薯片 $128炸蝦好香脆，醬汁惹味，蝦肉爽彈，配芝士牛肉漢堡，唔算好夾，但兩樣都好好味。手工薯片好脆口，唔會太薄，個醬有d煙燻味咁，幾正。加$8任飲汽水，幾抵呀。煙肉大爆炸芝牛肉漢堡配炸薯條 $108煙肉好多好邪惡，配焦糖化洋蔥，好鬼正，牛肉漢堡厚身，肉質鬆化多汁，唔會好油膩，隻辣椒仔唔太辣，幾香幾特別。個包不會過厚，又唔會被肉汁整淋，讚。粗薯都幾好。加$12任飲汽水。