漁獲浜燒 (已結業)

最近去咗銅鑼灣一間專食浜燒嘅日本餐廳食嘢，好食得嚟對得住價錢。特製黑松露炙燒平目魚邊沙律 （前菜）。沙律菜好新鮮，有黑松露味，平目魚炙燒過好香口，咬落滿口魚香味，肉質軟嫩。手握壽司分別有黑松露活帶子、池魚王、北海道牡丹蝦各兩件。池魚王肉厚得嚟幾鮮，鮮甜而彈牙。大大隻北海道牡丹蝦，肉質細嫩，鮮得嚟又清爽。黑松露活帶子壽司鮮嫩多汁，黑松露增添咗一層奢華感。第一次食甲羅燒，係好特別嘅菜色。首先將蟹蓋放喺烤爐上焗熟，再加入鵪鶉蛋。焗嘅時候攪拌蟹膏、蟹肉同鵪鶉蛋。之後羹仔舀出嚟食配黑芝麻餅乾一齊食，令我諗起出面啲吞拿魚夾餅餐，係好Cutie嘅做法！蟹膏同鵪鶉蛋Mix埋一齊，口感滑順，味道香口。每一啖都有蟹肉同蟹膏嘅甜味，配上麵包糠同蔥花嘅，令層次昇華。燒A5和牛扒，較為薄切，熟嘅程度啱啱好，肉質細膩嫩腍，好香牛味，咬落滿口燒過嘅牛脂，配上黑椒調味，味道一流。主食就揀咗漁獲海鮮鍋配稻庭烏冬，鍋入面有蝦、帆立貝、蠔、魷魚，仲有豆腐、菇、菜。海鮮好新鮮，湯底有淡淡嘅海鮮味，稻庭烏冬係偏幼身，索咗湯汁好惹味，食落煙韌同彈牙，易入口。甜品就揀咗蘋果雪芭，採用原隻蘋果，清清甜甜好fresh。