很得輝 (金滿閣)

營業中

休息中

街坊應該對呢間小食店唔陌生，晚上六點先開鋪做到零晨兩點，每次嚟到都排長龍，係排長龍！有時一早whatsapp落單，嚟到自取一樣要排餐懵。天氣熱起上嚟，企喺度等確係幾痛苦。不過呢度嘅滷水髀真心正，加咗價都忍唔住嚟買。老實講，係咪真係好抵食就見仁見智，但支持下街坊小店唔去7仔買微波爐雞髀，係一種生活態度。加上呢度隻滷水髀真係好入味，肉又嫩，介紹咗比幾個同事食個個讚好！炸髀都OK嘅，一定要熱辣辣個陣食，生炸冇厚粉，比起218五個零個啲贏幾條街望唔到車尾燈。皮脆，肉嫩，好juicy，買完立即喺條街度食，幾得帶定濕紙巾！枱面有啲調味粉，我見就係辣嘅居多。我自己就好少落呢啲，不過見有唔少人落魔鬼辣粉落得好重手，真係嚇親寶寶～至於珍奶就係因為有個雞髀+珍奶餐$50所以嗌嘅，珍奶質數就一般啦，歇腳X咁上下，但珍珠今日就未煮透，好硬。都明嘅，今晚排咗20幾張外賣單，排到天荒地老唔係講笑。舖頭有五個人係度炸嘢煮嘢同沖野飲，款式唔算多，所以我覺得都算係幾多人...唔知係咪唔熟手所以好似好亂咁，買完外賣記得check下單，間中會有漏單程況㗎。