大雞食堂

營業中

休息中

平時去到銅鑼灣比較少去銅鑼灣街市後邊覓食，今日就試吓去嗰度食一間好味嘅燒雞扒啦。去到餐廳嘅時候都已經係下午茶啦，但係老闆知道我想食雞扒撈丁都特登煮俾我食。呢啲人情味一定加分啦。而且好少餐廳會再咁樣照顧顧客嘅感受㗎啦。我就叫咗雞扒撈丁啦，朋友因為食咗午餐，所以佢叫個下午茶雞扒刈包就夠啦。雞扒撈丁嚟到啦。雞扒好香煎到皮脆肉嫩，肉質好滑，而且咬落去嘅仲會唧晒啲肉汁出嚟添。面底一定係出前一丁，煮得熟到啱啱好，煙煙韌韌絕對唔會過淋。靈魂醬汁一定係蔥油，蔥油放到落去公仔麵上邊撈埋一齊令到公仔麵分開而且咬落去油香滿面，香味十足。餐廳細細餐飲竟然可以選擇珍珠奶茶超正。朋友諗住食雞扒刈包細細份啦，點知塊雞扒勁大塊，上面亦都都係鋪滿咗蔥油。淡淡咬落去都好香。原來蔥油雞扒係咁夾㗎，就算你係食麵包食公仔麵都一樣好食。果然燒雞扒喺呢度嘅招牌。滿足嘅一個下午茶啊。