新記煲仔雞粥 (已結業)

今晚成班波友打完波，就拉大隊嚟左呢度食招牌雞粥做宵夜，之前嚟過食都係成間舖坐滿人，今晚雖然係閒日，一樣打爆，好在喺門口吹水十幾分鐘就有位。大部份人都係點雞粥，我就嚟個兩溝──豬潤雞粥，因為都幾餓，所以想食多D配料。好多人都知佢哋嘅雞粥係用貴妃雞嚟煲，呢個就係佢嘅賣點，就係佢成日爆棚嘅原因。貴妃雞食落特別香滑，雞味重，加埋豬潤，成煲粥勁多料，用砂煲盛載感覺好有風味，個粥底好綿好入味，吸晒食材嘅精華。呢排成日夜訓，所以追加左杯七喜龍眼冰下吓火，平時齋飲龍眼冰會覺得太甜，原來撞埋七喜個味道又幾特別喎，可以話係加倍透心涼，正！