牛之館 (已結業)

旺角行街，突然落勁大雨，我地行左去文華商場(MPM)避雨，加上到晚飯時間，我地係文華商場搵食，最後我地去了牛之館食火鍋放題。放題有特選11品、豪華20品、專尚24品，我覺最抵食專尚24品，所有牛肉都可以試晒，所以我地都點了專尚24品，加上以家有新張優惠，而且仲奉上刺身一客。自助吧有熟食、小食、生果盤、十多款丸類和蔬菜，另外飲品區竟然有乳酪，第一次見火鍋放題有得食。養生藥膳美人鍋入面有雞、紅棗、杞子等等，藥膳味道好濃郁，食到尾，藥膳味道依然濃郁，唔會愈食愈淡。牛肉有SRF和牛肩胛肉眼芯、澳洲草飼牛頸脊、特選安格斯牛板鍵、手切封門柳、安格斯牛小排，5款牛肉都好高質，各有特式，由其我最鐘意SRF和牛肩胛肉眼芯和特選安格斯牛板鍵，牛味好濃郁，而手切封門柳切到夠薄，滾一滾就食得。小食方面有炸榴連波波、雙絲雙皮奶、炸燒賣、芫茜天婦羅，炸物炸得出色，不會太油膩，最緊要有我至愛我榴連波波，入面有啖啖的榴連餡，仲要係熱辣辣。最後我地仲整左個格仔餅，好有成功感。